Тимот на Пролет со победа го отвори разигрувањето за опстанок во кое е меѓу главните фаворити за првото место. Избраниците на Никола Матлиески славеа против Струга со 30-23. Гостите успеваа да парираат во еден дел од првото полувреме, имаа свои минути и на стартот на второто полувреме, но тоа не беше доволно да се надеваат на нешто повеќе. Одлично функционираа домашните бекови, со поддршка на голманот Даскаловски и тоа беше доволно за Пролет да го почне плеј-аутот со триумф.
По неколку успешни интервенции во серија на искусниот Даскаловски, Пролет отвори одлично и поведе со 6-2, па 8-3, но гостите во продолжение заиграа подобро во одбрана, домашните грешеа во нападот и беа казнети.
Новајлијата Ристиќ, Мијушковиќ и Стојков стрелаа за реми 8-8 и комплетен камбек на стружани во натпреварот. Се играше гол за гол до 11-11, па тренерот Матлиески мораше да бара тајм-аут. Неговите играчи одново влегоа во ритам, струшкиот напад затаи, па Стојановски и Атанасовски со по два гола го однесоа Пролет на безбедни плус четири гола предност, а на пауза се замина со 15-12.
На стартот на вториот дел домаќините напаѓаа за плус пет, но не реализираа, им дозволија на стружани да се понадеваат на нов камбек во мечот, кои намалија на минус два, 17-15, потоа и 18-16. Сепак кога требаше да направат завршен чекор, не го сторија тоа, Пролет делуваше разиграно, особено бековската линија Стојановски-Андоновски-Мајнов, и на десетина минути до крајот беше 27-19 и беа решени сите дилеми.
Најдобри стрелци во победничкиот тим беа Стојановски и Андоновски со по шест гола, а одличен на голот беше Даскаловски. Во составот на Струга, Ристиќ даде шест погодоци, додека Стојков имаше пет реализации. На табелата Пролет ќе остане прв со пет бодови, додека Струга е четврта со еден бод. Во второто коло Пролет оди на незгодно гостување кај Прилеп, додека Струга ќе го пречека составот на Куманово.
