Германија-Хрватска 24:30 (14:13)
Израмнето и динамично прво полувреме одиграа Германија и Хрватска во Ланксес арената во Келн. Прекрасната атмосфера беше мотив за домашната селекција која подобро го отвори мечот и имаше почетно водство од 5:3. Хрватите во продолжение заиграа поефикасно во нападот што резултираше со мини серија од 3-0 по која Хрватска за првпат поведе на мечот 5:6 во 10.минута. Ракометарите на Перковац продолжија во ист ритам во најголем дел од првото полувреме, а во последните десетина минити се разигра капитенот Дувњак кој со три „бомби“ по ред го матираше Волф, и го донесе најголемото водство за својата репрезентација 10:13, во 25.минута. Сето тоа што го градеа во првото полувреме Хрватите го испуштија за само пет минути, во кои не успеаа да постигнат ниту еден погодок а примија четири. Хајман ја предводеше серијата и добрата игра на Германците по која поведоа со 14:13, и со минимално водство заминаа на одмор.
Вториот дел започна со три интервенции на извонредниот Кузмановиќ на голот на Хрватска. Тој беше ракометарот кој бранеше се што може да се одбрани на германските ракометари, и ја одржуваше својата репрезентација во игра. Одбраните на Кузмановиќ беа причина Германија цели шест минути да биде без погодок, а со головите на Караќиќ и Мараш „коцкастите“ повторно поведоа со 15:17 во 40.минута. Хрватска заигра многу побрзо во второто полувреме,па преку контри и полуконтри го загрозуваше германскиот гол. Карачиќ со својот трет гол ја доведе својата репрезентација до највисоки плус пет, 19:24 во 50.минута. Хрватите во последните десетина минути одиграа и најфуриозно и немаше дилеми кој ќе биде победник на мечот. На крајот коцкастите стигнаа до најубедлива предност за висок триумф од 24:30.
Карачиќ ја предводеше листата на стрелци со шест голови, а Кузмановиќ одигра фантастичен натпревар и забележа неверојатни 22 одбрани, по што беше прогласен и за МВП на натпреварот. Кај Германија Гола и Хајман постигнаа по четири.
ПОВРЗАНИ ВЕСТИ
