Екипата на Прилеп со победа го започна настапот во плеј-аут фазата, откако на свој терен го совлада Борец ФЛ со 28:21 и сега прилепчани со освоената победа имаат четири бода на свое конто.
Домашниот тим влезе моќно во натпреварот, демонстрирајќи цврста одбрана и разновидна игра, што резултираше со одличен почеток – 5:0 во воведните минути. Гостите од Велес својот прв гол го постигнаа дури по десет минути игра.
Прилепчани за петнаестина минути игра постигнаа осум, а примија само два гола, па така уште тогаш беше јасно дека дебитантот ќе има тежок предизвик. Ниту во последниот период од првото полувреме немаше поголеми промени и домаќините на пауза заминаа со предност од 14:7.
Избраниците на Илиески продолжија со доминантната игра во вториот дел, во 40-та минута зголемија на 20:12 и во тој момент веќе се „назираше“ убедливиот триумф.
Најефикасен во победничката екипа беше Денис Шабановиќ со шест погодоци, по пет имаа Христи Бикоски и Томислав Квастек. Кај Борец ФЛ се истакна Марио Миланов со четири погодоци, а три реализации имаше Бобан Петров.
Прилеп во 2. коло од плеј-аутот ќе го пречека Пролет, кој денеска ја совлада Струга, додека Борец ФЛ пред својата публика ќе се соочи со Радовиш.
Доколку Прилеп победи против скопскиот тим, тогаш ќе направи голем исчекор во битката за осптанок.
