Делегати, судии и експерти се собраа во Виена на подготвителен семинар пред женското ЕП 2026 година. Тридневниот семинар се одржуваше минатиот викенд, со цел сите делегирани судии што е можно подобро да се подготват за оперативните, техничките и нормативните барања на турнирот.
Македонски претставници меѓу официјалните лица се Даниело Божиновски и Виктор Начевски, кои ќе судат на ЕП 2026 во Полска, Романија, Чешка, Словачка и Турција, а беа дел од семинарот во Виена.
Програмата комбинираше практични вежби, експертски анализи, дискусии базирани на конкретни ситуации и насочена подготовка. Целта беше да се усогласат судиските стандарди, да се прецизираат процедурите и да се подобри координацијата меѓу сите лица вклучени во судиската работа.
На семинарот се обработуваа повеќе актуелни теми, меѓу кои промените во судењето, управувањето со социјалните мрежи, психолошката подготовка, донесувањето одлуки под висок притисок, користењето ВАР, како и други прашања поврзани со организацијата и спроведувањето на натпреварите.
Главната цел на семинарот беше сите судиски тимови да обезбедат конзистентен, професионален и единствен пристап во текот на целото ЕП.
