После децении негрижа, култната сала „Расадник“ и дом на двократниот европски првак Вардар ќе почне да се реконструира.
Откако Општина Кисела Вода ја презема салата од Јавното претпријатие за стопанисување со спортски објекти, најавена е реконструкцијата.
Проектот за реконструкцијата е веќе нарачан и во финална фаза, па наскоро ќе биде познато кога ќе се стартува со работа.
Средствата се обезбедени и проектот ќе биде реализиран преку Министерството за Спорт на Македонија, каде што од скоро на министерската функција е поранешниот Извршен директор на Вардар, Борко Ристовски.
„Денес со големо задоволство, заедно со градоначалникот на Кисела Вода, го најавивме проектот за реконструкција на салата „Расадник“! Оваа реконструкција е од огромно значење за нашата заедница и спортската сцена во регионот. Верувам дека овој проект ќе донесе многу позитивни промени и ќе создаде услови за нашите млади спортисти да ги остварат своите соништа. Како министер за спорт, горд сум што можеме да инвестираме во унапредување на спортската инфраструктура. Салата „Расадник“ ќе добие модерни услови кои ќе овозможат одржување на различни спортски и културни настани. Нашите млади спортисти ќе имаат можност да тренираат и да се натпреваруваат во врвни услови, што е клучно за нивниот развој и успех. Градоначалникот на Кисела Вода и јас сме посветени на создавање на средина во која сите граѓани, особено младите, ќе имаат можност да се занимаваат со спорт и рекреација. Оваа сала ќе биде центар на спортските активности во Кисела Вода и ќе ја зголеми гордоста на нашата општина. Проектот вклучува комплетна реконструкција на спортската сала, модернизација на инфраструктурата, нови спортски реквизити и подобрување на удобноста за спортистите и посетителите. Со оваа инвестиција, очекуваме значително зголемување на бројот на спортски настани и учество на различни спортски клубови. Со нетрпение очекувам успешна реализација на овој проект и многу спортски успеси, настани и незаборавни моменти во новата сала“, изјави министерот Ристовски.
ПОВРЗАНИ ВЕСТИ
