Репрезентативците кои се најдоа во тимот на Македонија за оваа ЕХФ недела веќе се во главниот град на Египет, Каиро, каде што денеска и утре ќе бидат одиграни две средби.
Лазаров на овој собир е во улога само на селектор, а на располагање имаше 23 ракометари, од кои 19 заминаа во египетската престолнина. На помладите ракометари ваквите собири ќе им бидат од големо значење.
„Намерно повикав поголем број на играчи. За младите е добро да има повеќе собири, да се подготвуваат, да играат против своите идоли. Свесен сум дека во прво време не може да се очекува многу од нив. Добро е да присуствуваат на тренинзите и видео сеансите, да го градиме системот и кога ќе дојде време само да се вклопат и да работиме нови работи“, коментира Лазаров.
Веќе се размислува за Европското првенство во јануари и дефинитивно целта е да се одработи најдобро што може уште сега за во јануари да биде кулминацијата.
„Ни претстои тежок и огромен предизвик. Европското првенство е поквалитетно од Светското. Меѓутоа имаме идеја, наши цели. Се надевам дека со квалитетна игра ќе ја заслужиме и среќата која е неопходна на големите натпреварувања, а ќе треба да ја заслужиме со посветеност и работа не само во овие седум дена туку низ целата година и верувам дека ќе одиграме квалитетно“.
Противникот за оваа ЕХФ недела е од Топ селекциите во светот и дефинитивно репрезентација со голем рејтинг и реноме. Составот на Египет е доста силен така што ќе треба да се одработи најдобро што може за да се види до каде е отидена формата кај момците.
„Египет е една од репрезентациите кои најмногу напредуваа во последните 3-4 години. На самите видео анализи го гледаме тоа. Од нив учиме како треба да се поставуваме како индивидуално така и колективно. Ги води одличен стратег каков што е Парондо, кој многупати покажа дека е одличен во тоа. Сега е тренер и во Германија во една амбициозна екипа како Мелзунген. Чест и задоволство ми е што ќе играме две квалитетни средби против нив за да видиме до каде сме“.
Селекторот потврдува дека играњето со вака силен ривал е со намера и дека целта е да се извлече најдоброто од овој двобој за да се успее во намерата да се види што и како ќе треба да се поправа, а што ќе може само да се надогради во следниот период.
„Намерно одбрав квалитетен противник. На момците им кажав дека победа против Египет не би ми значела многу. Истото е и со поразот. Најважно е да го видиме она што го сработивме колку ќе можат да го покажат на натпреварите и потоа со чиста глава да можеме да тргнеме во подготовките за Европското првенство. Сакам она што го работиме и да биде спроведено на терен. Треба да се одбере ростер кој не само физички туку и ментално да го покаже и да го издржи на терен“, вели селекторот Лазаров.
Двете средби, денеска и утре, започнуваат од 18:00 часот.
ПОВРЗАНИ ВЕСТИ
