Во големото дерби во рамките од Б групата, Шпанија беше подобра од Бразил со резултат 27:23. Иако се очекуваше поголем отпор од Бразил, сепак репрезентативките на Шпанија во последните дваесетина минути беа подобар противник и заслужено освоија нови бодови.
Првото полувреме од натпреварот помина во голема борба на двете репрезентации. Бразил тргна самоуверено со водство од 2:0 во почетните минути.
Шпанија од 20. минута па се до крајот заигра поангажирано во нападот и своја поддршка имаше од голманката, Силвија Наваро која покажа одлична партија меѓу стативите.
Водството на Бразил од три гола предност полека се намалуваше и во 26. минута, Шпанија направи целосен пресврт преку Лара Гонзалез за 12:11. По 30. минути игра резултатот беше нерешен, 13:13.
Репрезентацијата на Шпанија во второто полувреме покажа моќно издание. По десетина минути игра во вториот дел, Шпанија имаше плус четири разлика, 20:16, а ракометарките на Бразил никако не можеа да се вратат во игра.
Во последните десет минути играта на Бразил целосно исчезна, се зголемуваа грешките и одбраната дозволуваше лесни голови во нивната мрежа. Шпанија рутински го одржуваше водството и до крајот не дозволи да има изненадување.
Одлична на голот на Шпанија беше Силвија Наваро со фантастични 18 одбрани, односно 46% успешност на одбранети удари. Во шпанската „фурија“ најефикасна беше Нереа Пена со седум гола. Во поразената репрезентација, Бруна де Паула беше единствена светла точка со осум голови од 16 обиди.
ПОВРЗАНИ ВЕСТИ
