Висок пораз од Швајцарија, Македонија ќе разигрува за пласман од петто до осмо место

Машката младинска репрезентација на Македонија, го загуби последниот натпревар од групната фаза од Швајцарија со убедливи 31-14. Со овој пораз, Македонија заврши на четвртото место во групата поради послаба гол разлика од Украина и ќе разигрува за пласман од петто до осмо место на ЕХФ шампионатот во Варна.

Швајцарија поведе со 1-3 и 2-4, но следуваше серија одбрани на Галевски и погодоци на Македонија, па нашите ракометари го имаа првото и последно водство на овој натпревар, 5-4, по десет минути игра.

Потоа следуваше лоша игра на избраниците на Бранко Ангеловски. Пречки, стативи, промашени седмерци и пост од 12 минути без гол! За тоа време Швајцарија погоди пет пати, ја презема контролата на теренот и поведе со 5-9.

Димевски со гол во 22 минута намали на 6-9, но уште една „црна дупка“ во македонската игра и до крајот на првото полувреме, Швајцарија погоди уште три пати за убедливи 6-12 на пауза.

Со само еден гол за дваесетина минути, Македонија немаше што да бара на овој натпревар. Второто полувреме беше чиста формалност, ривалот веќе на стартот се одлепи на плус седум, 10-17, па македонскиот селектор им даде шанса на ракометарите од клупата.

Нашата селекција остана без Теодор Тодески, кој доби три исклучувања и црвен картон, па бевме лимитирани и во шутот од далечина. До крајот и составот на Швајцарција се измеша, но немаше големи промени на резултатот.

Македонија промаши дури четири пенали, реализираше само 14 гола од 49 напади, а ударната бековска двојка Тодески и Иваноски, погоди 5 пати од 20 обиди! Од крило реализиравме само еднаш, додека од пивотменската позиција немавме ниту еден обид за цел натпревар.

Македонија в сабота ќе игра против Луксембург, Литванија или Велика Британија, а в недела во зависност од резултатите на другите натпревари ќе одигра уште еден натпревар што ќе го одреди конечниот пласман.