Дали знаете кои се рекордерите во македонскиот ракомет – на еден натпревар постигнале 31 и 33 погодоци!

Несекојдневното достигнување на левото крило на Бутел Скопје, Марко Божиновски, кој на куп средбата против Кичево даде 21 погодок, не натера да се потсетиме на рекордерите по број на голови на еден натпревар одигран во Македонија.

Тој се израмни на листата на играчи со најмногу постигнати голови на еден меч со десното крило Никола Костески, кој во дресот на Металург, исто така на куп натпревар во сезоната 2014/2015 против Феникс даде 21 гол, а тимот од Автокоманда победи со 53-14.

Но повозрасните љубители на ракометот сигурно се сеќаваат на достигнувањата на левите крила Златко Димитровски и Матилда Атанасоска.

Некогашниот репрезентативец Димитровски во дресот на Винарска Визба Тиквеш од Кавадарци на суперлигашки натпревар против Куманово одигран во сезоната 2004/05 постигна 31 погодок, а мечот заврши во корист на кавадарчани со 16 погодоци разлика, 49-33. Тој го сруши дотогашниот рекорд на постигнати голови на еден меч, кој беше во сопственост на Игор Павловски од Металург, кој на првенствен меч со Струмица даде 22 гола.

Но сепак рекордот на најмногу голови постигнати на еден меч го има дама. Станува збор за поранешната репрезентативка Матилда Атанасоска, која во дресот на Кале Кичево на дуел со Тутунски Комбинат Бренд постигна неверпјатни 33 гола. Тимот од Кичево го доби овој натпревар со исто така неверојатни 54 голови разлика, 64-10!