Ракометарите на Охрид по триумфот над Бутел Скопје во првото коло од суперлигашкиот плеј-оф, ги чека тешка задача на домашен терен.
„Гладијаторите“ ќе го пречекаат актуелниот шампион Еурофарм Пелистер во СРЦ „Билјанини Извори“ пред своите навивачи.
Капитенот Иван Тасески вели дека Охрид нема што да загуби на мечот против шампионот и дека очекува ветар во грб од „Рибарите“.
„Плеј-офот го започнавме според планот со победа кај Бутел Скопје, иако имавме мал пад во играта при крајот на мечот, но важно победивме. Во недела ни доаѓа шампионот на Македонија, во натпревар на кој нема што да загубиме и ќе го дадеме нашиот максимум. Секој натпревар се добива со добра одбрана. Се надевам ќе имаме помош и од публиката, и дека навивачите ќе ни бидат ветар во грб. Ги повикувам „Рибарите“ и љубителите на ракометот да дојдат и да уживаат во спектаклот во недела. Ние ќе се бориме до самиот крај и се надевам дека нема да ни се случат падови како на некои од последните натпревари“, вели Тасески.
Натпреварот меѓу Охрид и Еурофарм Пелистер се игра в недела со почеток од 18:00 часот.
