Во следната сезона, покрај ЖРК Атлетик и ЖРК Јехона, нов клуб во единственото женско сениорско натпреварување во Македонија би требало да биде ЖРК Гевгелија Југ.
Станува збор за клуб кој ќе работи со сите категории, а токму работата со младите ќе биде главниот фокус.
Претседател на клубот ќе биде поранешната репрезентативка на Македонија, Елма Пршеш Попова, која беше дел од поголемите успеси на „црвено-жолтите“ (СП 1997 и ЕП 1998).
Гевгелија Југ е наследник на ЖРК Гевгелија, која имаше свои подеми и падови на домашна сцена.
„Новиот клуб ЖРК Гевгелија Југ е наследник на ЖРК Гевгелија, само што овој клуб е со нова постава во однос на Управниот Одбор и стручниот штаб, кој сè уште го формираме. Го наследуваме играчкиот состав комплетно од стариот клуб, сè уште не можам да потврдам дали само со тие играчи ќе влеземе во наредната сезона, зависи од многу други фактори”, изјави Пршеш Попова.
ЖРК Гевгелија Југ ќе вложи голем труд и ангажман за да ја продолжи традицијата.
,,Покрај сениорската екипа, ќе се даде голем фокус и на работа со најмалите категории. ЖРК Гевгелија е клуб со богата историја и еден од најстарите формирани клубови во Македонија (формиран во 1957 година), така што имам голем императив да се врати ракометот во градот и да му се даде местото кое го заслужува, секако со голем труд и ангажман на спортските работници и девојчињата кои ќе го носат дресот на овој клуб”, вели Елма Пршеш Попова.
Допрва раководството на Ракометната федерација на Македонија треба да донесе одлука за системот на натпреварување во Женската лига за следната сезона, бидејќи бројката на екипите во сениорска конкуренција сигурно ќе биде поголема од 16.
