ЖРК Спартак продолжува со градење на тимот за новата сезона, во која скопскиот клуб влегува со зголемени амбиции. По ангажманот на младата надеж Теида Беровиќ, ново звучно име што би можело да пристигне во составот на новиот тренер Симе Симовски е хрватската ракометарка Петра Јершек.
Спартак е во преговори со 23-годишниот бек, која веќе има искуство од македонското првенство. Јершек во Македонија настапуваше за Ѓорче Петров, со кој освои двојна круна, а потоа беше дел и од Металург Автокоманда.
Станува збор за ракометарка која најчесто игра на левата или средната бековска позиција, но во дел од кариерата има настапувано и како десен бек. Токму таа поливалентност е една од причините поради кои би била корисно засилување за Спартак, клуб што сака да добие поголема ширина и поквалитетна ротација во бековската линија.
Јершек потекнува од школата на Осијек, каде што настапуваше до 2022 година. Со хрватскиот клуб седум сезони беше дел од елитното натпреварување во Хрватска, а низ тој период се наметна како играч со сериозен потенцијал. Беше дел и од кадетската и младинската репрезентација на Хрватска, што дополнително го потврдува нејзиниот ракометен развој.
Првото интернационално искуство го имаше во Шпанија, каде од 2022 година две сезони беше дел од Сан Хозе Обреро, клуб што се натпреварува во елитната конкуренција. Потоа во 2024 година пристигна во Македонија и го облече дресот на Ѓорче Петров, со кој стигна до шампионската титула и Купот на Македонија.
Минатата сезона Јершек ја мина во Металург Автокоманда и во хрватскиот тим Брод, а сега би можела повторно да се врати на македонската сцена, овојпат во дресот на Спартак.
Скопскиот тим во новата сезона ќе го води Симе Симовски, тренер со богато искуство во женскиот ракомет, а амбициите во клубот се значително повисоки од претходно. Преговорите се во тек, а доколку се реализира трансферот, Спартак ќе добие ракометарка со искуство од Хрватска, Шпанија и Македонија, со настапи во младинските селекции на Хрватска и со веќе освоена двојна круна во македонскиот ракомет.
____________________________________________________________________________________________________
▶▶▶ Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
