Прилеп од 20 до 23 август повторно ќе биде домаќин на меморијалниот ракометен турнир „Миле Нешкоски“, кој и ова лето ќе биде една од главните подготовки за македонските клубови пред стартот на новата сезона. Тој ќе биде генерална проба за многу екипи кои тука ќе настапат пред стартот на сезоната.
На годинашното издание ќе настапат шест екипи, сите од Македонија. Домаќинот Прилеп ќе ја има честа пред својата публика да ја провери формата пред новите суперлигашки предизвици, а покрај прилепчани, дел од турнирот ќе бидат и Бутел Скопје, Тиквеш, Младост Богданци, Еурофарм Пелистер 2 и „витамините“ од Автокоманда.
Ова ќе биде 11. издание на меморијалниот турнир, кој традиционално се игра во чест на прилепската ракометна легенда Миле Нешкоски. Минатата година турнирот го имаше јубилејното, десетто издание, а актуелен победник на турнирот е Еурофарм Пелистер 2, кој во финалето во 2025 година славеше против домаќинот Прилеп со 32-26.
Турнирот „Миле Нешкоски“ со години има посебно место во ракометниот календар, бидејќи се игра во период кога екипите ги темпираат подготовките, ги тестираат новите состави и ги проверуваат засилувањата пред официјалниот старт на сезоната.
Прилепскиот турнир низ годините прерасна во традиционален настан со меморијален карактер, но и со натпреварувачка тежина. Покрај спортскиот дел, турнирот секоја година ја чува и спомен-приказната за Миле Нешкоски, име кое останува значајно за прилепскиот ракомет.
Домаќинот Прилеп и оваа сезона има амбиции да направи исчекор во Супер лигата и да се вклучи во битката за плеј-оф, па турнирот ќе биде важен тест за тимот пред стартот на новите обврски. Бутел и Тиквеш доаѓаат како екипи со суперлигашко искуство и амбиции за горниот дел од табелата, но и претставници во ЕХФ Европскиот Куп. Младост Богданци се враќа во фокусот како традиционална ракометна средина, додека Еурофарм Пелистер 2 ќе го брани трофејот освоен лани.
Распоредот на натпреварите и групите треба да бидат потврдени дополнително, но веќе е јасно дека од 20 до 23 август Прилеп ќе биде центар на подготвителниот ракомет во Македонија.
____________________________________________________________________________________________________
▶▶▶ Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
