Охрид беше многу блиску до победа во драматичната пресметка со Еурофарм Пелистер, но на крајот мораше да се задоволи со бод. Борис Ројевиќ по натпреварот беше емотивен, им се заблагодари на навивачите, застана зад своите играчи и порача дека клубот од Охрид заслужува поголема почит.
Малку недостасуваше Охрид да го започне новото првенство со голема победа против Еурофарм Пелистер, но сепак мечот заврши реми, 28-28.
Во натпревар во кој резултатот постојано се менуваше и ниту една од екипите не успеа посериозно да се одлепи, на крајот решаваа нијанси. Борис Ројевиќ токму во тие ситници ја гледа причината поради која неговиот тим не успеа да ги задржи двата бода во „Билјанини Извори“.
Сепак, првите зборови на тренерот на Охрид по натпреварот беа упатени кон публиката и неговите ракометари.
„Благодарам на охридската публика, која беше сјајна како и секогаш. Имаше одличен амбиент во салата. Она што сакам да го кажам е дека ме боли срцето за овие момци, кои дадоа свој максимум. Би сакал само малку повеќе почит кон ракометниот клуб Охрид. Мислам дека тоа го заслужуваме“, порача Ројевиќ.
„Овие момци го даваат максимумот“
Ројевиќ и по ремито остана зад својата екипа. Охрид во изминатиот период остана без неколку важни играчи, а промените во составот неизбежно се чувствуваат. Сепак, тренерот е задоволен од односот и борбеноста на оние кои во моментов го носат најголемиот товар.
„Загубивме некои многу важни играчи и тоа се чувствува. Но овие момци што се тука го даваат својот максимум. Тоа е максимумот на оваа екипа во овој момент. Мислам дека некои работи во последните натпревари можеа да завршат поинаку, но на момците не можам да им замерам за желбата и борбата“, истакна Ројевиќ.
Охрид имаше периоди во кои можеше да направи поголема разлика, но не ги искористи своите можности.
Пет удари на празен гол – ниту еден погодок
Кога се бараат причините зошто Охрид не стигна до победата, Ројевиќ беше многу конкретен.
„Нијанси решаваа. Тоа се работи кои мораме да ги дотераме. Во првото полувреме имавме пет шута на празен гол и не дадовме ниту еден. Тоа се ситуации кои на ваков натпревар едноставно мора да ги реализираш“, објаснува тренерот на охриѓани.
Таквите пропуштени можности на крајот добиваат уште поголема тежина кога натпреварот се решава во последните секунди. Но тренерот на Охрид гледа простор за напредок и на уште една позиција.
Ројевиќ чека повеќе и од голманите
Тренерот на Охрид отворено зборуваше и за голманскиот учинок.
„Имавме слаби учинок од голманите денес, исто како и во Супер Купот. Потребно ни е што побрзо голманите да проработат. Тоа е нешто што е до нас и на кое мораме да работиме“, вели Ројевиќ.
Неговиот став е дека токму ваквите детали ќе ја прават разликата во натпреварите со најсилните домашни ривали.
Охрид веќе покажа дека може рамноправно да се носи со екипите од самиот врв, но ако сака тие неизвесни дуели почесто да ги претвора во победи, ќе мора да ги намали подарените шанси.
„Ако Охрид игра вака, ќе биде во врвот“
И покрај разочарувањето поради испуштената победа, Ројевиќ има голема верба во својот тим.
„Ако Охрид игра вака во текот на целата сезона, мислам дека нема да има проблем да биде во врвот. Решаваат нијанси, а тие нијанси се нешто на што можеме да работиме и да ги поправаме“, потенцира тренерот.
Токму во тоа може да се бара и позитивната страна на првиот голем првенствен тест. Охрид покажа дека и со променет состав, со проблеми и со простор за подобрување, може да оди рамноправно со еден од главните кандидати за трофеите.
Бодот можеби не беше она што го посакуваа во „Билјанини Извори“, но Ројевиќ по натпреварот испрати јасна порака – неговите момци заслужуваат признание за она што го даваат на теренот, а Охрид сака да продолжи да биде дел од самиот врв на македонскиот ракомет.
