Сите екипи од Првата лига, во машка и женска конкуренција, ќе добијат спортска опрема за играчите и стручните штабови. Опремата ќе биде од охридскиот бренд STELLAR, кој веќе соработува и со дел од суперлигашките клубови во Македонија.
Ракометната федерација на Македонија ќе обезбеди спортска опрема за сите екипи што ќе настапуваат во Првата лига, во машка и женска конкуренција, што претставува значајна поддршка за клубовите од вториот ранг на натпреварување.
Станува збор за проект со кој РФМ сака да им помогне на прволигашите во делот на основните трошоци за настап и организација, но и да придонесе за подобар визуелен и професионален изглед на натпреварувањето.
Секоја екипа ќе добие опрема за 16 ракометари, како и опрема за стручниот штаб. Предвидени се по два комплети спортска опрема и тренерки, со што клубовите ќе имаат унифициран настап во текот на сезоната.
Опремата ќе биде изработена од STELLAR, бренд од Охрид, кој во последните години е сè поприсутен на македонската ракометна сцена. STELLAR веќе облекува и дел од суперлигашките екипи, а сега преку овој проект ќе биде присутен и кај клубовите од Првата лига.
Во машка конкуренција, лигата ќе брои 14 екипи, а според новите насоки, фокусот ќе биде ставен на домашните играчи и на создавање простор за млади ракометари кои треба да собираат минутажа и искуство.
За многу прволигашки средини, ваквата поддршка значи олеснување во буџетот, бидејќи трошоците за натпреварувачка опрема не се мали, особено за екипи што работат со ограничени средства.
Истовремено, ова е чекор и кон подобра презентација на лигата. Унифицирани дресови, тренерки и опрема за стручните штабови треба да донесат посериозен изглед на натпреварите, подобра организација и повисоко ниво на натпреварувачки стандард.
▶▶▶ Добивај директно РАКОМЕТНИ ВЕСТИ вести на твојот мобилен телефон
VIBER GROUP – https://abit.ly/viber-24rakomet
Со еден клик до сите вести.
