Лоши вести за Есбјерг и норвешката репрезентација. Нора Мерк заработи сериозна повреда на првенствениот натпревар против Хорсенс, а дополнителните прегледи покажаа дека станува збор за скршеница на глуждот. Засега нема информација колку долго ќе паузира.
Нора Мерк ја очекува нова пауза од ракометните терени. Данскиот ТВ2 објави дека деталните прегледи по повредата на натпреварот Есбјерг – Хорсенс потврдиле скршеница на глуждот.
Несреќниот момент се случи во средата. Мерк го започна натпреварот на клупата, а на теренот мина само краток период. При една измена се судри со еден од судиите, незгодно стапна и веднаш падна на паркетот со силни болки.
На Норвежанката ѝ беше потребна помош за да го напушти теренот, а потоа беше пренесена во болница на рендгенски преглед. Првичните информации говореа за повреда на глуждот, но новите медицински наоди покажаа дека повредата е посериозна и дека има скршеница.
Тренерот на Есбјерг, Томас Акснер, уште по натпреварот призна дека сцената ги потресла и останатите ракометарки.
„Тоа малку нè погоди и бевме потресени по случувањето. Ниту ракометарките не знаеја што точно се случило“, изјави Акснер.
Есбјерг сепак убедливо го совлада Хорсенс со 37-23, но резултатот остана во сенка на повредата на една од најискусните ракометарки во тимот.
Повредата доаѓа во незгоден момент за данскиот шампион. Есбјерг веќе во недела го очекува важен натпревар во Лигата на шампионите против ЧСМ Букурешт, а Мерк сигурно нема да може да му помогне на тимот во периодот што следува.
Колку точно ќе трае паузата засега не е соопштено. Нема официјална информација дали ќе биде потребна дополнителна интервенција, ниту кога би можела да започне со рехабилитација.
Повредата е проблем и за Норвешка. Мерк неодамна повторно беше дел од репрезентацијата, а на 24 и 25 октомври Норвежанките треба да играат натпревари од Златна лига против Холандија и Данска, како дел од подготовките за Европското првенство во декември. Норвешка е во група со Романија, Македонија и Швајцарија.
Мерк има 35 години и сезонава продолжува да има важна улога во Есбјерг. Според статистиката на ЕХФ, во актуелната сезона од Лигата на шампионите веќе има постигнато 16 гола.
▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾
