Босанскиот ракомет се соочува со сериозна криза која би можела да има големи последици. Поради тешката финансиска состојба и блокираната сметка на Ракометниот сојуз на БиХ, младинската репрезентација најверојатно нема да отпатува на Европското првенство во Романија, а тоа може да повлече и сериозни санкции од Европската ракометна федерација.
Според информациите на босанскиот „Ослободување“, на РСБИХ му се заканува парична казна од 80.000 евра. Дополнително, доколку репрезентацијата не настапи на ЕП, постои опасност сите репрезентации и клубови од БиХ да добијат двегодишна суспензија од европските натпреварувања.
Младата селекција на БиХ обезбеди место на Европското првенство со освојувањето на ЕХФ Шампионатот пред две години, а во Романија требаше да игра во група со Шведска, домаќинот Романија и Израел. Сепак, поради финансиските проблеми, нивниот настап е доведен во прашање.
Од Ракометниот сојуз на БиХ засега нема официјална реакција за ситуацијата. Доколку не се најде итно решение, босанскиот ракомет би можел да се соочи со една од најтешките казни во својата историја.
