Селекторот на Македонија, Кирил Лазаров изрази задоволство од победата над Катар, прва во групната фаза за нашата репрезентација или вкупно втора на овој мундијалски настап.
„Им честитам на играчите за она што го даваат за овој дрес и за Македонија. Тешко е, петти натпревар на едно големо натпреварување и да имате фокус и концентрација, и борба, секоја чест за нив. Ние веруваме во она што го работиме! Свесен сум дека имаме квалитет, веруваме во системот, во поставувањето на стратегијата и во нашите навивачи. Се гледа дека немаме искуство, три до четири пати го вративме Катар во натпреварот. Презадоволен сум, но во исто време и малку незадоволен затоа што против поквалитетен противник нема да може да победиме. Важно е дека имаме и глава и опашка, и уште еднаш, секоја чест на момците за односот, вербата и како се борат на теренот. Штета што ги немаме навивачите од првиот круг, но тоа е што е, го прифаќаме тоа и им ја посветуваме оваа победа на сите во Македонија“, коментираше Лазаров по триумфот на Катар.
Следен противник за ракометарите е еден од топ-фаворитите Франција, со кој играме в недела.
„Франција е Франција! Имаме некоја идеја, да промениме нешто. Тие се фаворити за златен медал, не само во мечот со нас. Играат во еден страшен ритам. Голем дел од нив се мои колеги со кои играв пред неколку години. Немаме што да загубиме! Ќе пробаме да се надигруваме, ќе пробаме да го смениме начинот на игра, затоа што вака немаме шанси, но и во двата случаи ќе биде многу тешко“.
