Тимот од градот на Црн Дрим продолжува да создава респектабилен состав за новата сезона. Ново име во Струга е српскиот лев бек Предраг Родиќ, ракометар со богата интернационална кариера.
РК Струга продолжува со засилувањата пред стартот на новата сезона и носи уште едно искусно име во ростерот. Нов ракометар на тимот од градот на Црн Дрим ќе биде Предраг Родиќ, српски лев бек кој зад себе има богата кариера во повеќе европски првенства.
Со неговото доаѓање, Струга добива ракометар со висина, сила и искуство во бековската линија. Настапува на позицијата лев бек, со можност да помогне и во одбранбени задачи.
Во кариерата Родиќ настапуваше за повеќе клубови и помина низ различни ракометни средини. Беше дел од Синтелон Бачка Паланка, Црвена Звезда, Партизан, унгарски Мезоковешди, португалска Брага, имаше и епизоди во Словачка, во грчки Дукас, во Кувајт, како и во словенечка Ајдовшчина. Бил дел од младите селекции на Србија.
Родиќ носи профил што му е потребен на тим кој сака брзо да се стабилизира. Со својата висина од 205 сантиметри, тој може да донесе дополнителна моќ во нападот, поголема опасност од бековската линија, но и физичко присуство во одбраната.
Струга ова лето веќе испрати јасна порака дека не сака само да биде дел од Супер лигата, туку да направи тим што ќе биде конкурентен. Претходно покрај езерото се врати Марио Танкоски, најголемото засилување во преодниот рок, а клубот ги донесе и Мице Шилегов, Костадин Петров, Дарко Георгиевски, Пеце Рајатоски, Мартин Јовановски и Христијан Крстаноски.
Сега со Предраг Родиќ, стружани добиваат уште една опција во бековската линија и уште повеќе искуство во составот. Ако Танкоски треба да биде главниот организатор на играта, Шилегов носи брзина на крило, Петров цврстина на шест метри, а Георгиевски поливалентност во бековската линија, тогаш Родиќ треба да донесе сила, шут и дополнителна длабочина во нападот.
РК Струга има посебно место во македонскиот ракомет како еден од најстарите клубови. Градот покрај Црн Дрим и Охридското Езеро со децении е препознатлив по ракометната традиција, а клубот со новата амбициозна управа и со локални млади ракометари продолжува да создава простор за афирмација и развој.
_________________________________________________________________________________________
▶▶▶ Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24ракомет. Со еден клик до сите вести.
_____________________________________________________________________________________________________
