Tимот од Астибо славеше на гостувањето кај Пелистер во Битола со 30-27 во натпреварот од 10 коло во Супер женската лига. „Амазонките“ предводени од Марија Анчева која даде 14 погодоци против поранешниот тим, сега на делба на петтото место заедно со Куманово со седум бода.
Младиот тим на битолчанки имаше контрола на резултатот четириесетина минути и предност од плус четири, 22-18.
Но се чини дека домаќинките прерано почнаа да слават, Астибо за десетина минути направи чудесен пресврт и даде седум гола по ред за 25-22 и се чинеше дека рутински ќе го реши мечот.
Но избраничките на Моника Талевска не се предадоа и израмнија на 27-27 преку Стојчевска, кога остануваа да се играат уште три минути. Анчева погоди од тешка ситуација, а потоа Чобанова одбрани пенал на гостинките.
Искусната штипјанка уште еднаш реализираше во домашната мрежа за 29-27, битолчанки промашија втор пенал по ред и веќе немаше дилеми околу победникот.
Покрај Анчева, седум гола за Астибо даде Вероника Мутемека, додека Анастасија Тодоровска и Ана Стојчевска стрелаа по седум пати за Пелистер.
