Тимот на Младост Богданци ја продолжува перфектната сезона. Во натпревар од 12. коло, избраниците на Горан Андоновски славеа над Аеродром со 36-31 и стигнаа до одличен учинок од 11 победи на 11 натпревари.
Во салата „Млаз“, домаќините доминираа во првиот дел и заминаа на одмор со убедливо водство од 23-15.
Во второто полувреме избраниците на некогашниот играч и тренер на Младост, Митко Стоилов, заиграа подобро, во еден момент дојдоа на минус два, 30-28, но немаа сили за комплетен камбек.
Домаќините во последните десетина минути ја стабилизираа играта и не дозволија да бидат изненадени.
Најрасположен кај победниците беше Даниел Андоновски со 11 гола, а по осум пати погодија Лазар Адамовиќ и Ѓорѓе Ѓуриќ. Кај гостите, најпрецизен беше Никола Иванов со седум погодоци, додека Матеј Марковски и Бојан Поповски реализираа по шест пати.
