Македонскиот вицепрвак Еурофарм Пелистер продолжува со натпреварите во Лигата на Европа, а следен предизвик е бундеслигашот Фуксе Берлин.
Пивотот Жарко Пешевски, вели дека може да ја израдуваат битолската публика ако се спојат сите коцки.
„По кратка пауза ни доаѓа еден екстремно силен тим од Бундеслигата. Фуксе Берлин оваа година е конкурент за освојување на шампионатот на Германија и конкурент за трофејот од Европската лига. Се подготвуваме максимално, ваков натпревар се игра пред полни трибини и тоа е мотив плус за нас. Имаме проблеми со повредени ракометари, но во вторник ќе се консолидираме и ќе го дадеме најдоброто од себе“, вели Пешевски.
Тој добро го познава составот на Фуксе бидејќи три сезони беше дел од Бундес лигата.
„Фуксе Берлин е склоп на ѕвезди, германски репрезентативци и интернационалци. Мислам дека се конкуренти за сите титули, играат брз ракомет, имаат одлична одбрана, потпомогнати со добри голмани. Тука е Милосављев, кој мислам дека две години е најдобар голман во Бундеслигата. Тие се сериозна екипа и треба и ние да сме подготвени, да имаме среќен ден и поддршка од публиката. Така може да ја израдуваме битолската публика и да направиме чекор напред во групата. Секој натпревар е ново докажување, нова шанса за одличен натпревар. Имаат густ натпревар, играат секој втор ден, патуваат… Во Битола нема натпревар без притисок, така ќе биде и во вторник, но со мирна глава и добра подготовка имаме наша шанса“, заврши Пешевски.
Натпреварот меѓу Еурофарм Пелистер и Фуксе Берлин се игра во „Боро Чурлевски“ со почеток во 18:45 часот.
Лемго, Еурофарм Пелистер, па Рајн Некар Левен – три меча за шест дена!
ПОВРЗАНИ ВЕСТИ
