Екипата на Пролет ја продолжи победничката серија во Суперлигата, откако славеше на гостински терен кај составот на Јуниор КВ со 34-25. Клучен беше стартот на вториот дел кога Пролет се одлепи резултатски, додека домашниот состав беше рамноправен, па дури и водеше со плус три во првиот дел.
Јуниор КВ тргна фуриозно и поведе со 7-4 на стартот, а Пролет во меѓувреме остана без десниот бек Доне Мајнов. Тој доби црвен картон поради приговор од судиите Андонов и Јовановски во 10. минута.
Тренерот на Пролет, Лембанов, мораше во игра да го внесе Јагуриновски, па нападот на гостите стана поопасен. Беше и 8-5, но домашниот тим влезе во „црна дупка“ и подолго време не можеше да постигне гол.
Пролет ги казнуваше сите грешки и направи комплетен пресврт. Поведе со 9-8, беше и 11-9, а до крајот на полувреме гостинските ракометари одржуваа предност од еден или два гола разлика, 16-14.
Веднаш на стартот на вториот дел погодија Пецаковски, Аларов и Јагуриновски за 19-15 и најавија дека се дојдени по трите бода. Јуниор КВ немаше многу решенија во нападот, нивната одбрана беше лесно пробивана и Пролет лесно стигна до 27-18 во 45 минута.
Тука веќе беше јасно дека победата ќе ја однесе фаворитот на овој натпревар и до крајот само рутински беше одржана и зголемувана разликата. Шанса за настап добија кадетските репрезентативци од Пролет – Тотиќ, Димковски и Стојановски.
Дејан Пецаковски беше стрелец на седум гола за Пролет, додека по шест пати погодија Јагуриновски и Џонов. Во составот на Јуниор КВ се истакнаа Филип Петровски со девет и Филип Николов со шест гола.
ПОВРЗАНИ ВЕСТИ
