Селекторот на машката сениорска репрезентација на Полска, Патрик Ромбел го објави скратениот список на ракометари од кои ќе ги одбере патниците на Мундијалот.
Меѓу избраните ракометари се наоѓа и левото крило на Вардар, Јан Чувара, како и екс членот на ,,црвено црните” Патрик Валчак, кој моментално настапува во екипата на Спортинг.
Списокот е надополнет и со еден од клучните играчи во репрезентацијата на Полска, Симон Сичко, кој сѐ уште е неизвесен за настап на Мундијалот. Покрај 22 играчи за подготвителниот период, искусниот стратег ќе може да смета и на седум резервисти, во случај некој од играчите да се повреди.
Како што е веќе познато, еден од поискусните во полската репрезентација, Камил Шипжак ќе го пропушти Мундијалот поради повреда.
Полска пред стартот на Мундијалот ќе тестира против Тунис, Бразил и Јужна Кореја. Избраниците на Ромбел на Светското првенство, на кое Полска заедно со Шведска се ко-организатори на големиот настан, ќе играат во групата Б заедно со селекциите на Франција, Словенија и Саудиска Арабија.
ПОВРЗАНИ ВЕСТИ
