Прилепчани ја прекинаа серијата од четири порази во низа – го освоија Радовиш

Во рамките од 20. коло од Супер машката лига, екипата на Прилеп прослави победа против Радовиш со 36:28.

Првото полувреме мина во интересна борба бидејќи ракометарите на Радовиш дадоа солиден отпор против Прилеп. Натпреварот го отвори гостинскиот тим со погодокот на Чантурија за водство од 1:0, а потоа домаќините преку Постолов израмнија на 1:1.

Прилеп на крилата на Шокоски и Чантурија константно беше во водство од еден гол разлика, но до 20. минута никако не можеше да се одлепи на поголема позитива. Во 17. минута од натпреварот, тренерот на Радовиш, Ангелов, побара тајм-аут со цел неговите ракометари да влезат во побрз ритам.

Но, неговите совети немаа големо влијание кај неговите избраниците. Ракометарите на Прилеп влегоа во убава серија и со погодоците на Трајкоски, Гичев и Андоновски, стигнаа до плус три, 11:8. Прилепчани во последните десет минути од првото полувреме ја искористија секоја дадена прилика од противникот и лесно стигнуваа до погодок.

Ракометарите на Горан Кузманоски имаа водство и од највисоки четири гола разлика, 14:10 и 15:11. Тоа беше сосема доволно да обезбедат активен резултат од 16:12 на полувреме.

Падот во играта кај Прилеп во второто полувреме беше причина за камбек на домашниот тим. Иако, Прилеп имаше водство од 20:17 и 21:19, ракометарите на Радовиш во 40. минута целосно се вратија во игра откако стигнаа до нерешен резултат, 21:21. Кризниот период кај Прилепчани беше прекинат со погодокот на Шокоски за водство од 22:21.

По неговиот погодок, следуваа уште два погодоци на гостинската екипа за плус три разлика, 24:21. Екипата на Прилеп секогаш кога требаше да го направи вистинскиот чекор и да ја обезбеди победата, му даваше надеж на противникот. Радовиш последната шанса ја имаше на десет минути пред крајот, но не успеа да погоди за 27:27.

Во последните осум минути, Прилеп не дозволи никакво изненадување. Радовишани попуштија во финишот, а составот на Прилеп успеа да го зголеми водството за конечни плус осум гола разлика, 36:28.