Охрид го сруши Пролет, на чекор е до суперлигашки плеј-оф!

Во натпреварот кој беше директен дуел во борбата за обезбедување место во плеј-офот екипите на Охрид и Пролет одиграа одличен натпревар. После голема борба до бодовите стигнаа ракометарите на Охрид со 23:20.

Пролет одлично го започна натпреварот, со цврста одбрана гостите уште на почеткот имаа водство од 1:4 и 2:6. Веднаш реагираше Раде Стојановиќ со тајм аут и тоа донесе резултат. Со четири последователни гола Охрид израмни на 6:6.

Домаќините имаа три напади да стигнат до првото водство на натрпеварот но не усепаја, а до крај на првиот дел се играше израмнето. Џонов погоди за 9:10 на неколку секунди пред полувремето, но Охрид врати на празната мрежа за конечни 10:10 на полувреме.

Во почетните минути од вториот дел Пролет успешно ја чуваше предноста од два гола сè до средината на вторите 30 минути. Двете екипи посветуваа големо внимание на играта во одбрана, а таквата игра им овозможи на домаќините да израмнат повторно.  Охрид во продолжението за првпат беше на нерешено во 47. минута кога Николов од седмерец погоди за 16:16.

Јане Цветковски одбрани седмерец за нова можност на Пролет да отиде на два позитива, но во следниот напад Шилегов пресече топка, а Тасески донесе ново израмнување во 52. минута. Во следниот напад Шилегов реализираше за прво водство на Охрид од 19:18.

Во завршните пет минути ракометарите на Охрид беа посконцентрирани, во 58. минута Кривокапиќ погоди за 21:19, а потоа со третата интервенција за само неколку минути Брауновиќ го доближи својот тим до победа. Пролет се обиде со пресинг да избегне пораз но Николов ја потврди победата на Охрид.

Во завршницата попуштија нервите и директен црвен картон заработија Давор Палевски и Филип Николов. Најефикасен во победничкиот тим беше Филип Николов со десет гола, а четири постигна Кривокапиќ. Во тимот на Пролет Палевски со шест гола беше прв стрелец.