Вардар му се одмазди на Еурофарм Пелистер 2 за единствениот суперлигашки пораз

Македонскиот шампион Вардар му се одмазди на Еурофарм Пелистер 2 за единствениот пораз во Суперлигата. Вардарци на домашен терен беа подобри од битолчани со убедливи 32-20.

Победникот беше најавен уште во првиот дел. По 4-3, тргна серија на домаќините од пет гола по ред преку Дибиров, Тото и Њокас за сигурна предност од шест гола, 9-3. Битолчани намалија на 10-6, но потоа уште една вардарова серија и веќе беше 13-6.

Тренерот на Еурофарм Пелистер 2, Александар Јовиќ пробуваше со неколку измени во тимот да го наруши ритамот на Вардар, но не успеа и до крајот на полувреме разликата се искачи на осум, 19-11.

Второто полувреме беше само формалност и немаше многу возбудувања на теренот. Шанса за настап добија играчите со помала минутажа од двете екипи, но тоа немаше големо влијание на резултатот.

На крајот убедлива победа на “црвено-црните” со која беше најавено гостувањето кај Монпелје в среда во рамките на Лигата на шампионите и она против Нексе в петок во рамките на СЕХА лигата.

Најдобри стрелци кај победникот беа Тимур Дибиров со седум гола, како и Оливие Њокас и Куни Моралес кои дадоа по четири гола, додека кај Еурофарм Пелистер 2 се истакнаа Павле Петровиќ и Филип Арсеновски со по четири погодоци.