Ракометарите на Вардар в четврток го играат првиот четвртфинален натпревар од регионалната СЕХА лига против хрватскиот првак Загреб.
Македонскиот шампион објави на клупскиот сајт дека натпреварот ќе може да го следат најмногу 1.800 гледачи.
„На првиот четвртфинален натпревар од СЕХА лигата меѓу Вардар и Загреб во СЦ „Јане Сандански“ ќе биде дозволен влез на одреден број на публика. Добиена е дозвола за искористување на капацитетот на салата до максимални 1.800 гледачи, кои ќе може да го следат натпреварот во четврток од 20:15 часoт.
Според последните протоколи што ги усвои Владата, влез ќе им биде дозволен само на лицата кои ќе имаат:
*сертификат/потврда за извршена имунизација (вакцинација) од вирусот SARS-CoV-2, односно примена најмалку прва доза вакцина против заразната болест КОВИД-19 или *сертификат/потврда за прележан КОВИД-19 во последните 45 дена, сметајќи од денот на оздравувањето, за лица над 18-годишна возраст истиот треба да го покажат при влегување во салата.
Билетите за влез ќе бидат бесплатни и ќе може да се подигнат од (пред влезот на малата сала во СЦ „Јане Сандански“ во среда (25 август 2021 година) во периодот од 11:30 до 15:30 часот. Подигањето на поканите (билетите) ќе биде додека има слободни места. Едно лице може да подигне најмногу 2 (две) покани (билети) за натпреварот. Останува правилото при добивање на билетите да се покаже соодветен документ за идентификација (лична карта) и сертификат, според протоколите на Владата. При подигањето на билетите ве молиме на одржување на дистанца во однос на другите лица кои исто така ќе бидат пред билетарницата. Доколку имате покана (билет) за натпреварот, а при влез не покажете ВАЛИДЕН сертификат, нема да може да влезете во салата да го следите натпреварот. Во салата ве молиме да се придржувате до препорачаните мерки, и одржување на соодветна дистанца на седиштата. Задолжително ќе биде носење на маски во текот на натпреварот, односно од влегувањето во салата“, се вели во објавата на Вардар.
Натпреварот меѓу Вардар ќе се игра в четврток во СЦ „Јане Сандански“ со почеток во 20:15 часот.
ПОВРЗАНИ ВЕСТИ
