ЖРК Спартак продолжува да гради тим со сериозни амбиции за новата сезона. Хрватската ракометарка Петра Јершек, која претходно беше во преговори со скопскиот клуб, стави потпис и најмалку една сезона ќе го носи дресот на тимот од Кисела Вода.
Иако имала и други понуди, 23-годишната ракометарка решила да се приклучи на амбициозниот проект на Спартак, кој летово прави јасни чекори кон создавање поконкурентен состав. Со нејзиното доаѓање, новиот тренер Симе Симовски добива квалитетно и поливалентно решение во бековската линија.
Јершек е ракометарка која најчесто игра на левата и средната бековска позиција, но во дел од кариерата настапувала и како десен бек. Токму таа ол-раунд карактеристика беше една од причините поради кои Спартак инсистираше на нејзиниот потпис, бидејќи тимот добива поголема ширина, повеќе опции во нападот и поквалитетна ротација.
Хрватката веќе има искуство од македонското првенство. Во Македонија настапуваше за Ѓорче Петров, со кој освои двојна круна, а потоа беше дел и од Металург Автокоманда. Тоа значи дека добро го познава домашниот шампионат, ривалите и стилот на игра, што треба да ѝ помогне побрзо да се адаптира во новата средина.
Јершек потекнува од школата на Осијек, каде настапуваше до 2022 година. Со хрватскиот клуб седум сезони беше дел од елитното натпреварување во Хрватска, а во тој период се наметна како ракометарка со сериозен потенцијал. Беше дел и од кадетската и младинската репрезентација на Хрватска, што дополнително го потврдува нејзиниот квалитет и развоен пат.
Првото интернационално искуство го имаше во Шпанија, каде од 2022 година две сезони го носеше дресот на Сан Хозе Обреро, клуб што се натпреварува во елитната конкуренција. Потоа во 2024 година пристигна во Македонија и го облече дресот на Ѓорче Петров, со кој стигна до шампионската титула и Купот на Македонија.
Минатата сезона ја мина во Металург Автокоманда и во хрватскиот тим Брод, а сега повторно се враќа на македонската сцена, овојпат како засилување за Спартак. За тимот од Кисела Вода ова е уште еден доказ дека новата сезона се подготвува со јасна идеја и поголеми амбиции од претходно.
Спартак претходно ја ангажираше младата Таида Беровиќ, а со потписот на Јершек добива уште едно значајно име во ростерот. Комбинацијата од млади ракометарки, домашни сили и интернационално искуство треба да биде основата на новиот проект на Симовски.
Тренерот Симе Симовски има богато искуство во женскиот ракомет, а неговото доаѓање на клупата беше првиот сигнал дека клубот сака да направи исчекор. Сега, со засилувања како Јершек, Спартак покажува дека не сака само да биде дел од конкуренцијата, туку да изгради состав што ќе биде незгоден за секој ривал во лигата.
____________________________________________________________________________________________________
▶▶▶ Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24Ракомет. Со еден клик до сите вести.
_____________________________________________________________________________________________________
