Ракометарите на Охрид во рамки од 14. коло од Супер лигата на свој терен ќе се соочат со Прилеп, кој се бори за едно од местата кои водат во плеј-оф фазата.
Избраниците на Стевче Алушовски на првиот натпревар во Прилеп триумфираа со четири гола разлика, 30:26.
Членот на Охрид, Дејан Кукуловски, истканува дека ќе мора максимално да влезат во утрешниот натпревар и да имаат мал број технички грешки.
„Прилеп е млада екипа, покажа дека може да се носи со сите екипи и покажа дека може да се бори за горниот дел од табелата, мислам дека нема да биде лесен натпревар, ние сме фаворити и мора фаворитската улога да ја оправдаме на теренот. Секако, како и на секој натпревар, така и в сабота ќе одиграме со сите сили и се надевам на продолжување на победничката серија. Ја анализиравме нивната игра, имаат добра одбрана, а ние треба да одиграме со помалку технички грешки“, изјави Кукуловски.
Натпреварот меѓу Охрид и Прилеп ќе се одигра во спортската сала „Билјанини извори“, со почеток од 18:30 часот.
