Ракометарите на Прилеп во рамки од 12. коло во Супер лигата на свој терен ќе го пречекаат дебитантот од Автокоманда.
Прилепчани во утрешниот дуел ќе се обидат да излезат од резултатската криза и ќе атакуваат на трета сезонска победа.
Тимот на Иван Марковски на првиот дуел против Прилеп триумфираше со 31:30 и сигурно ќе сака повторување на играта од првата меѓусебна пресметка.
Ракометарот на Прилеп, Никола Цветаноски, ги истакна своите очекувања за дуелот.
„Имавме доволно време овие десет дена да се средиме психолошки, а и тактички да го анализираме противникот. Напорно тренираме и имаме голем мотив за победа и доколку победиме, ќе имаме шанса да пренесиме што е можно повеќе бодови во плеј-аутот. Во секој поглед, максимално сме подготвени и одиме на победа”, изјави Цветаноски.
Левиот бек се надева на победа и на освојување на три бода во дуелот со тимот од Автокоманда.
„Мулти Есенс е млада и подготвена екипа, играат брз ракомет и се надевам дека ќе успееме со добра одбрана и внимателност во нападот да дојдеме до победа и да се реваншираме за поразот од Скопје. Можевме да се бориме и за подобра позиција, но на неколку натпревари среќата не беше на наша страна”, вели Цветаноски.
Стружанецот повторно очекува исполнети трибини и голема поддршка од публиката.
„Имаме голема поддршка од нашите навивачи на секој натпревар и заслужуваат со победа да им се оддолжиме на најдобар можен начин. Со нашата борбеност како екипа и атмосферата во тимот, сигурен сум во поволен резултат. Се надевам дека салата повторно ќе биде исполнета до последно место, а публиката ќе биде нашиот осми играч”, заврши Цветаноски.
Дуелот меѓу Прилеп и Мулти Есенс ќе се одигра в сабота (25 ноември) во спортската сала при СОУ “Ристе Ристески-Ричко” со почеток од 18:30 часот.
ПОВРЗАНИ ВЕСТИ
