Тимот на Борец ФЛ во драматичен натпревар ремизираше со составот на Прилеп, 38-38, иако домаќините можат да жалат што испуштија десет гола предност, а гостите можат да жалат бидејќи промашија во последната секунда чист зицер, односно голманот Ѓурѓевиќ го одбрани шутот на Шабановиќ.
Велешани го надиграа ривалот во второто полувреме и беа на добар пат кон два бода, водеа десет разлика, но скапо ги чинеше прераното опуштање домаќините и Прилеп на крајот се радуваше на голем бод, што може да им биде многу значаен во битката за првата позиција пред стартот на плеј-аутот.
Се играше гол за гол до 8-8, а потоа домаќинот преку Цвитановиќ и Димов поведе со плус два, 10-8. На двете страни се постигнуваа лесни погодоци, а велешани полека со подршка од голманот Ѓурѓевиќ ја градеа предноста. На паузата беше 23-20.
Клучниот период беше кон средината на вториот дел. По 25-22, прилепчани не постигнаа погодок седум минути, а избраниците на Владимир Глигоров ги казнуваа сите грешки и се одлепија на плус седум, 29-22.
Новиот тренер на прилепчани, Страшо Илиески кој го замени Божидар Мојсов, се обиде со тајм-аут да ги смири своите избраници, но наместо да заиграат подобро, работите одеа на полошо и Борец ФЛ на десетина минути до крајот имаше десет гола разлика, 34-24.
Сепак домашните се опуштија, на терен влезе втората постава, а прилепчани заиграа посериозно, со пресинг успеаја да пресечат неколку напади, погодуваа во серија и намалија на минус еден на 90 секунди до крајот, 37-36.
Димитров погоди по долга пауза за домаќините за плус два, но следуваа две грешки на велешани, Прилеп погоди за реми, 38-38, а имаше и напад во последната секунда, но зицерот на Шабановиќ го одбрани Ѓурѓевиќ.
Најдобри стрелци кај победникот беа Гуедеш со девет и Миланов со шест гола, додека кај Прилеп по седум погодоци имаа Цветаноски, Илиески и Шабановиќ. Во последното коло прилепчани ќе го пречекаат шампионот Еурофарм Пелистер, додека Борец ФЛ оди на гостување кај Тиквеш во Кавадарци.
