Норвешкиот репрезентативец и ракометар на Фленсбург, Кент Робин Тонесен, помина низ сериозна здравствена драма за време на летниот одмор во Хрватска. Сè започнало со болка околу десното око, а по враќањето во Германија било утврдено дека има херпес кој го зафатил и пределот околу окото.
Летниот одмор во Хрватска за Кент Робин Тонесен требало да биде време за семејството и одмор пред почетокот на новата сезона, но наместо тоа искусниот норвешки бек поминал низ една од најтешките здравствени ситуации во кариерата.
Набргу по пристигнувањето во Хрватска, 35-годишниот ракометар почувствувал силни болки во пределот околу десното око. Побарал лекарска помош, но на првиот преглед не била поставена конкретна дијагноза. Веќе следниот ден неговата состојба се влошила.
Медицинскиот тим на Фленсбург веднаш реагирал и му порачал да го прекине одморот и да се врати во Германија.
По деталните прегледи било утврдено дека Тонесен има херпес на лицето, а инфекцијата го зафатила и пределот околу окото. Според германските медиуми, постоела реална опасност од сериозно оштетување, па дури и губење на видот на десното око.
Првите недели Тонесен ги опиша како исклучително тешки. Мораше целосно да ги прекине спортските активности и да почне со терапија.
„Никогаш досега не сум почувствувал таква болка. Беше брутално“, изјави Норвежанецот за германскиот SHZ.
По неколку недели без тренинг, неговата состојба постепено се подобрувала и му било дозволено полека да се враќа на спортските активности.
Но паузата оставила последици врз физичката подготвеност.
„По првиот тренинг се чувствував како две недели да имам воспаление на мускулите“, раскажа Тонесен, кој полека повторно почна да работи со екипата.
Норвежанецот сега е многу поблиску до враќање на теренот и вели дека полека повторно го враќа „ракометот во телото и главата“.
Интересен детал е што токму Хрватска на официјалниот профил на Тонесен на страницата на Фленсбург е наведена како неговата омилена дестинација за одмор.
Тонесен е десен бек со богата европска кариера. Има 148 настапи за норвешката репрезентација, а низ кариерата играше за Вецлар, Фуксе Берлин, Веспрем, ПИК Сегед и ПСЖ, пред во летото 2025 година да пристигне во Фленсбург. Со Норвешка има и сребро од Светското првенство во 2017 година.
Фленсбург во меѓувреме објави дека соработката со искусниот Норвежанец ќе заврши по актуелната сезона. Германскиот клуб за следната сезона веќе ги договори Виго Кристијансон и Франциско Кошта за десната бековска позиција.
По она што го преживеа во текот на летото, сепак, за Тонесен во моментов најважната победа е што повторно е блиску до враќање на ракометниот терен.
▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾
