Женската репрезентација на Македонија го запиша третиот пораз во третиот натпревар на Медитеранските игри во Таранто.
Алжир беше подобар од комбинираната селекција кадетки и младинки на Македонија и славеше со 37-23.
По стартните 5-5, ривалот се одлепи на плус пет, 10-5 и тогаш беше решен победникот. На паузата Алжир водеше со 20-11, а вториот дел беше само одработен рутински.
Најдобри стрелци кај Македонија беа Миленкоска со шест и Павичевиќ со четири гола, а голманките Миноска и Гошевска комбинираа десет одбрани.
За Македонија остануваат уште пресметките со домаќинот Италија и Косово на 28 и 30 август, како и мечот за пласман на 2 септември.
