Актуелниот шампион на Македонија, Еурофарм Пелистер имаше пенал за победа во последните секуниди од дуелот со тимот од Автокоманда, но Богдан Радивојевиќ не успеа да го надмудри Иван Галевски, па средбата заврши со реми, 26-26 (17-13). И првиот дуел одигран во Автокоманда во септември заврши со реми, 33-33.
Битолчани со овој бод останаа на второто место на табелата, но заостануваат четири бода зад лидерот Вардар, а на делба на третото место се „гладијаторите“ од Охрид и „сините“ од Автокоманда.
Еурофарм Пелистер имаше водство од 23-16 во 40 минута, но потоа едноставно застана. Му дозволија на ривалот да направи серија со која во 52 минута намали на 24-22. Но, тука не застанаа „сините“ бидејќи ги користеа сите шанси, па во 57 минута намалија на 25-24, носејќи драма во завршницата.
Со играч помалку поради исклучувањето на Тајник, гостинските ракометари на 27 секунди до крај преку Игор Ѓоргиевс израмнија на 26-26, првпат во второто полувреме. Имаше домаќинот уште еден тајмаут, кој тренерот Гарабаја го искористи. Жарко Пешевски изнуди пенал, но Радивојевиќ не успеа да го реализира.
Домаќините имаа уште една добра серија од 5-0 во првото полувреме со која од 12-12, во 24 минута набрзина отидоа на 17-12 водство во 28 минута. До тој момент, и двата тима има своии минути во кои водеа, но никој не успеа да направи повисока разлика.
Гостите во своите редови го имаа и Урош Борзаш кој поради повреда неколку кола не беше во состав, имаше лош процент на реализација, 1/8. Најпрецизен кај гостите беше Марко Стојковиќ со 8 гола од 9 обиди, а 6 гола даде Игор Ѓоргиев. Кај домаќините Дејан Манасков погоди 9 пати од 17 обиди, а Филип Кузмановски даде 5 гола.
Никола Митревски одбрани 13 топки, а Марко Кизќ и Иван ГАлевски, заедно има 11 одбрани.
