Во рамки на 12. коло од хрватскиот шампионат, ракометарите на Загреб стигнаа до нова сигурна победа, совладувајќи го Рудар со убедливи 40-26 (21-16) на домашен терен.
Домашниот состав од самиот старт го контролираше мечот и со агресивна одбрана и брза транзиција полека ја градеше предноста.
Најдобри стрелци беа Давор Чавар со девет гола, додека Алекс Кавчич и Ивано Павловиќ постигнаа по шест погодоци. Анте Грбавац и Сандро Мештриќ одбранија по шест противнички удари.
Дебитираше десното крило Матеја Додиќ, кој не ја почна сезоната по повредата, а за дуелот со Рудар отпадна Давор Гавриќ, кој веројатно нема да игра ниту против Еурофарм Пелистер во Лигата на шампионите во среда.
Значајниот натпревар за македонскиот првак се игра в среда, на 3 декември, со почеток во 18:45 часот во „Арена Загреб“.
