Младост имаше 29-27 во 56. минута, но битолчани најдоа сили за уште едно враќање и мечот заврши без победник. По вторпат богданчани губат бод на свој терен, исто како и со Прилеп. Последната минута се играше речиси 7 минути, а домашните имаа шут за победа, но немаше ниту шут.
Еурофарм Пелистер 2 одигра 30-30 на гостувањето кај Младост Богданци во шестото коло од Суперлигата. Домаќините водеа со 14-11 на полувреме и имаа најмногу шест гола предност, но гостите израмнија на почетокот на вториот дел, а во завршницата се изборија за бод.
Давид Димевски го постигна првиот гол на натпреварот, по што Младост ја презеде контролата и поведе со 3-1. При 8-5 гостите не искористија неколку напади, меѓу кои и седмерец на Кристијан Симоновски што заврши во стативата. Младост подоцна врза три гола за 12-6 во 23. минута, што беше највисоката разлика. Пелистер 2 до одморот намали на 14-11.
Битолчани одлично го отворија второто полувреме. Симоновски погоди двапати, Божидар Илиески еднаш и со серија од 3-0 израмнија на 14-14. Младост повторно се оддалечи, иако при 17-16 голманот на гостите одбрани седмерец на Даниел Андоновски. Домаќините потоа стигнаа до 22-17 и изгледаше дека повторно ја имаат контролата врз резултатот.
Уште една шанса за гостите се отвори при 23-19. Тогаш беше одбранет седмерец на Славе Јанковски, а Димевски и Илиески погодија за 23-21. Младост одговори и поведе со 26-22, но Пелистер 2 не се откажа. Со головите на Симоновски и Стефан Лазаревски гостите се доближија на 28-27, пред Андоновски да погоди за 29-27 во 56. минута. Во преостанатиот дел битолчани постигнаа три, а примија еден гол за конечни 30-30.
