Ракометарите на Бутел Скопје не успеаја да стигнат до бодови на гостувањето кај Прилеп, кој славеше со 30-20.
Сега Прилеп има 12 бодови и рамноправно се вклучува во трката за плеј-офот од осмата позиција, додека Бутел Скопје падна на седмото место со 13 бодови.
Димитар Димитриоски со седум и Томислав Квастек со шест гола го предводеа Прилеп до важен триумф, додека Димитар Узунчев беше најдобар стрелец кај гостите со шест погодоци.
Домашните поведоа на стартот со 5-0, па беше 7-1 и 12-3, па уште во раната фаза на мечот стана јасно која екипа ќе се радува. Гостинскиот тренер Горан Кузманоски искористи два тајм-аути, но на неговите избраници ништо не им одеше од рака.
На паузата прилепчани водеа со 15-7, а во второто полувреме немаше никакви возбудувања на теренот и момците на Наум Танески само рутински ја доработија започнатата задача.
Во следното коло Бутел Скопје ќе игра на домашен терен против Куманово, а Прилеп ќе гостува кај Пролет.
