По четири врзани порази екипата на Пролет конечно запиша победа во Супер лигата, против тимот што досега нема освоено бод, Радовиш, со убедливи 30-23.
Пролет со овие бодови сега има 11 и се наоѓа на седмата позиција, пред Прилеп кој има десет, но и меч помалку. Трката за место во ТОП 6 фаза станува се поинтересна и позамрсена.
Пролет поведе со 9-1 по 13 минути и уште тука практично го реши победникот на овој натпревар. Имаа гостите и плус десет, 13-3, радовишни врзаа четири гола и го направија за момент поинтересен мечот, но на паузата беше 15-10 за избраниците на Никола Матлиески.
Сепак во вториот дел комплетно доминираше гостинската екипа и немаше преголеми возбудувања, па со овие бодови Пролет се враќа во битка за плеј-офот во Супер лигата.
Најдобри стрелци во победничкиот тим беа искусните Давор Палевски со седум и Ласко Андоновски со шест гола, додека пет за Радовиш даде Здравко Постолов. Во следното коло Пролет ќе го пречека Прилеп, додека Радовиш ќе гостува во Автокоманда.
