Ракометарите на Тиквеш им се вратија на победите по поразот од Автокоманда и на домашен терен ја совладаа Струга со 32-25.
Сега кавадарчани имаат 16 бодови на петтото место на табелата и направија чекор напред во битката за место во плеј-офот, пред конкурентите Бутел со 13 и Еурофарм Пелистер 2 со 12 кои имаат и меч помалку.
Најдобри стрелци во победничкиот тим беа Мијушковиќ и Стојановски со по пет погодоци, додека голманското трио – Печурица, Панов и Велков запишаа 11 интервенции.
Во составот на Струга најефикасен беше Мајдуб со седум гола, а по четири пати погодија Костов и Ферукоски.
Домаќините водеа во текот на целиот меч, имаа и осум гола залиха во првото полувреме, 13-5, a на паузата беше 18-12. Во вториот дел упорните стружани намалија на минус четири, но немаа сили за камбек во натпреварот. Двајцата тренери им дадоа шанса на сите расположиви сили.
Во следното 15 коло, Тиквеш му гостува на вицепрвакот Вардар, додека Струга ќе го пречека шампионот Еурофарм Пелистер.
