Легендарната Бојана Поповиќ, од 1 септември ќе биде дел од стручниот штаб на женската ракометна репрезентација на Данска, каде ќе соработува со новата селекторка, Хеле Томсен.
Поповиќ, која зад себе има блескава играчка кариера и повеќе од пет години тренерско искуство, ќе дебитира во новата улога пред собирот на репрезентацијата во Фредериксхавн на 15 септември, во рамки на подготовките за Светското првенство кое ќе се игра во Германија и Холандија.
Во Данска таа е вистинска легенда – четирикратна ракометарка на годината и шесткратна шампионка во Лигата на шампионите во дресовите на Шлагелсе, Виборг и Будуќност. Од 2002 до 2010 година настапуваше за Шлагелсе и Виборг, оставајќи силен белег во данскиот ракомет.
„Со Бојана сум во контакт со години и многу сум среќна што ја прифати поканата. Таа носи огромна страст и темперамент од Источна Европа, кои ќе ја надополнат нашата скандинавска култура. Таа е врвен професионалец и верувам дека ќе ни помогне да се искачиме на уште повисоко ниво,“ изјави селекторката Томсен.
Поповиќ во играчката кариера освои сребро на ОИ во Лондон 2012 со Црна Гора, а со Југославија беше бронзена на СП 2001. Како селекторка на Црна Гора (2021–2024) освои бронза на ЕП 2022 и седмо место на СП 2023. Во моментов таа е и предводничка на Будуќност Подгорица, кој игра на регионалниот турнир во Скопје.
„Голема чест е да бидам дел од данската репрезентација. Знам дека очекувањата се огромни, но верувам во квалитетот на оваа селекција. Моја задача ќе биде да ја поддржам Хеле Томсен и целиот тим за да оствариме нови успеси. Верувам во напорна работа, дисциплина и единство,“ изјави Поповиќ.
Првиот голем предизвик ќе биде Светското првенство 2025, каде Данска ќе игра во групата А во Ротердам против Хрватска, Јапонија и Романија.
Данска последните години е редовно на пиедесталот – бронза на СП 2021 и 2023, сребро на ЕП 2022 и 2024, како и бронза на ОИ во Париз 2024.
