Иако го имаше последниот напад за победнички гол, сепак екипата на Тиквеш не успеа да слави на гостувањето кај Струга и мораше да се задоволи со поделба на бодовите, 25-25.
Упорните домаќини диктираа темпо, во еден момент во вториот дел водеа и со три гола, потоа и губеа со три, па на крајот нерешено можеби е најреален резултат со оглед на случувањата на теренот.
Се играше гол за гол во најголем дел од првото полувреме, до 8-8, кога домашните со двата гола на Пајкоски и Џигероски за првпат поведоа со плус два, 10-8. Таквата предност ја имаа во три наврати, но на пауза се замина само со гол позитива, откако Манасков намали на 12-11.
Стружани во ист стил го започнаа и второто полувреме, водеа со 16-13, но искусните гости се вратија во игра и ја преземаа резултатската контрола со серија од пет гола.
Ниту тоа не беше доволно за мирен финиш, жилавите домаќини одново беа егал, 19-19. Тиквеш водеше со еден или два гола, а на три минути до крајот при водство на кавадарчани со 24-23, Остиќ му одбрани пенал на Андоновски.
Домашниот стратег повика тајм-аут, акцијата отиде до Стојков и тој погоди за реми, 24-24, кога остануваа да се играат 120 секунди. Беше и 25-25, но последниот напад беше за кавадарчани.
Имаше обид за гол со цепелин, но Остиќ го одбрани ударот на Обина и мечот заврши нерешено. Најдобри стрелци кај Струга беа Стојков со осум и Пајкоски со седум, додека кај Тиквеш осум пати погоди Манасков, а седум реализации имаше Анастасовски.
