Шпанскиот стратег Раул Алонсо пристигна во Македонија, и в недела ќе го преземе раководењето со македонскиот првак Еурофарм Пелистер.

На денешната средба со Прилеп, шампионот ќе го води Звонко Шундовски, а новиот стратег ќе дебитира в среда.

Алонсо по ангажманот во Бундес лигата во тимот на Ерланген, доаѓа во Битола и потпиша договор со пелистерци до летото 2026 година.

Натпреварот меѓу Еурофарм Пелистер и данската Фредериција се игра в среда во салата „Боро Чурлевски“ со почеток во 20:45 часот.

Аргентинецот Гиљермо Милано почна да ги води тренинзите на Вардар и веќе во сабота нa гостувањето во Струга треба да дебитира на клупата на најтрофејниот македонски ракометен клуб.

Tој вели дека со нетрпение чекал да пристигне во македонската престолнина и да започне со работа со двократниот европски првак.

„Со нетрпение го очекував доаѓањето во Скопје и запознавањето со ракометарите, и веќе ги имав и првите тренизни со екипата. Морам да кажам дека како тим со кој ќе раководам имам вистински професионалци кои ми оставија одличен впечаток. Првите впечатоци се одлични, и очекувам, и знам дека ќе напредуваме на секое поле. Не очекува период полн со натпревари, но верувам дека сите заедно ќе успеме во исполнување на поставените задачи“, изјави Милано.

Дел од ракометарите кои настапуваа за своите национални репрезентации се пожалија на мали повреди и тие ги пропиштија првите тренинзи неделава, но набрзо ќе се приклучат на екипата.

Тимот на Тримо Требње, каде што тренер е селекторот на младинците на Македонија, Раде Стојановиќ, се врати на победничките патеки во Словенија.

По поразот од Целје минатото коло, Тримо Требње на домашен терен прослави убедлива победа над Копер со 35-20.

Избраниците на Стојановиќ победата ја најавија уште по првиот дел, кога водеа со осум гола разлика, 18-10.

Тримо Требње досега освои 14 бода и се наоѓа на четвртото место на табелата зад Слован Љубљана со 19, Целје со 18 и Горење со 15 бода.

Следен предизвик за Стојановиќ и Тримо ќе биде домашниот натпревар со Иванчна Горица на 22 ноември.

Репрезентативката на Македонија, Сара Стефаноска, заедно со Јагогина се израдуваа на петтиот сезонски триумф во српскиот шампионат.

Јагодина за ривал во 8. коло го имаше некогашниот шампион на Србија, Наиса Ниш, и успеа да триумфира со плус шест, 27:21.

Екс ракометарката на Вардар во дадената минутажа на теренот запиша четири гола од шест обиди, а зад своето име имаше и две асистенции.

За Јагодина ова беше важна победа пред реванш натпреварот против Јонијас во рамки од 3. коло од Европскиот Куп.

Клубот на Стефаноска на првиот дуел беше поразен од грчкиот клуб, загуби со седум гола разлика, 27:20.

Женската репрезентација на Македонија в понеделник ќе ги започне подготовките за настапот на Европското првенство, но со една ракометарка помалку од предвидените 21 на кои смета(ше) селекторот Кристијан Грчевски.

Универзалниот бек на Металург Автокоманда, Борјана Коцева, нема да биде дел од македонската експедиција за Унгарија, бидејќи заработи повреда на еден од прстите на шутерската рака, што ќе ја оддалечи од теренот во следниот период.

Коцева беше на претходните два собири и играше на пријателските со Австрија, како и на дуелите на „Трофеј Карпати“.

На списокот на селекторот Грчевски остануваат во комбинација 20 ракометарки, а дали ќе биде дополнително повикана уште некоја ракометарка, останува да се види.

Македонија ќе биде дел од „Кроација Куп“ во Пореч од 22 до 24 ноември и ќе тестира со домаќинот Хрватска и со Србија, а на ЕП 2024 ќе игра против Шведска, Унгарија и Турција.