Ракометарите на Вардар ја запишаа деветтата победа во суперлигашката конкуренција, откако на гостувањето во „Македонско сонце“ кај Пролет славеа со 28:24 во натпревар од 10. коло.
Домаќинот во поголемиот дел од првото полувреме беше повеќе од рамноправен противник, во неколку наврати имаше и резултатска предност, но „црвено-црните“ во последните десет минути од првиот дел го сопреа налетот на домашниот тим, не му дозволија да има ни најмал напредок во играта и на пауза заминаа со предност од плус седум, 17:10.
Избраниците на Владо Недановски имаа целосна контрола во вторите 30 минути, во кои немаа многу проблеми за да дојдат до триумф, водеа и со седум до осум гола разлика, но домашниот тим успеа да се избори за поблаг пораз.
Најефикасен во победничката екипа беше кружниот напаѓач Милан Лазаревски со шест погодоци, еден помалку постигнаа Стефан Петриќ и Дарко Ѓукиќ.
Кај Пролет најефикасни беа Филип Арсеновски, Ласко Андоновски и младинскиот репрезентативец Томислав Димовски. Тројцата ракометари во мрежата на гостите постигнаа по пет погодоци.
Следен предизвик за Вардар е дуелот против Прилеп, додека Пролет во следното, 11. коло ќе му гостува на дебитантот Мулти Есенс.
ПОВРЗАНИ ВЕСТИ
