По комплетирањето на последното коло во најквалитетата лига на светот, тимот на Кил ја врати титулата во своите витрини, откако го освои првото место, со само два бода повеќе од второпласираниот и минатогодишниот победник Магдебург.
Ракометарите на Филип Јиха во последниот дуел силите ги одмерија со Гепинген и забележаа убедлива победа од 34:27, со што го потврдија шампионското место во Бундес лигата. На втората позиција заврши ланскиот шампион Магдебург, кој и во следната сезона ќе има директно место во Лигата на шампионите.
Фуксе Берлин го освои третото место, Фленсбург заврши на 4. позиција, додека Рајн Некар одигра под сите очекувања и натпреварувачката сезона 2022/23 ја заврши на петто место. Хановер е екипата која заврши зад најдобрата петорка и со освоеното шесто место избори излез на европска сцена.
Тимот на Вецлар, кој е предводен од поранешиот македонски репрезентативец Филип Миркуловски, обезбеди опстанок во Бундес лигата. Дел од екипата на Вецлар е и актуелниот репрезентативец Филип Кузмановски, но битолчанецот поради повреда го пропушти финишот на сезоната.
Од Првата Бундес лига отпаднаа екипите на Минден и Вестфален, кои се селат во понизок ранг на натпреварување, додека Балинген и Есен се враќаат во најсилната лига.
ПОВРЗАНИ ВЕСТИ
