Машката репрезентација на Македонија славеше со 27-25 против Чешка во реванш средбата од баражот и обезбеди место по осми пат на Мундијал. Иако нашите ракометари имаа контрола во текот на мечот, водеа во повеќе наврати со три и четири гола разлика, сепак на крајот имаше драма. Кузмановски со голот од пенал на Кузмановски на 13 секунди до крајот донесе победа за Македонија и пласман на СП.
По почетните 2-2, Чесите преку Кашпарек и Чип стигнаа до највисоки плус два, 2-4 но следуваа серија одбрани на Митревски и пет гола во серија за Македонија, па по десетина минути беше 7-4.
По 8-5, Сабате мораше да бара тајм-аут, по што неговите избаници постигнаа два гола во серија за 8-7. Во продолжение се играше гол за гол, но откако Пирох погоди за 10-9 во 20 минута, Чешка влезе во црна дупка.
Кузмановски реализираше пенал, погодија уште Миркуловски и Лазаров, па Македонија се одлепи на 12-9. Беше и 13-10, имавме напад за плус четири, но Мрква го запре ударот на Кузмановски.
Младеновиќ заработи исклучување, а тоа го искористија гостите кои намалија на 13-12 преку Пацел. Кузмановски погоди за 14-12, а потоа имаше по еден неискористен напад на двете страни за плус два за Македонија на паузата.
Вториот дел тргна со гол за Хрстка, за 14-13, но Македонија набрзина си ги врати највисоките дотогаш плус три, 17-14. Повторно левото крило на Чешка реализираше во нашата мрежа, а Мрква се надоврза со одбрана на шут на Пешевски.
Но и Митревски запре шут на Кашпарек, па Македонија одново беше на плус три, 18-15. По десетина минути игра во вториот дел, Сабате мораше да бара тајм-аут, бидејќи нашите момци за првпат стигнаа до четири гола предност, 20-16.
Пирох набрзина погоди во нашиот гол, а потоа и Хрстка реализираше пенал за 20-18. Митревски го запре Чолева од зицер позиција, а потоа му одбрани и на пикерот Петровски од чиста ситуација.
Чесите уште еднаш не искористија напад да намалат на минус еден, па Талески ги казни со гол „а ла Дибиров“ за 21-18. Во продолжение се играше гол за гол, а Кузмановски промаши контра за нови плус четири.
Чешка не се откажуваше и на десетина минути до крај намали на 24-22, па Лазаров побара тајм-аут. Митревски одбрани, но и Мрква исто така на спротивната страна во следните напади за нови возбудувања во финишот.
Јагуриновски погоди за 25-22, па Патцел возврати, a Чешка се доближи и на минус еден, 25-24, кога Кашпарек заработи исклучување на четири минути до крајот на мечот. Но Кузмановски згреши, па гостите добија шанса да напаѓаат за реми кој не беше искористен.
Лазаров повика тајм-аут, па Талески со бомба го погоди голот на Мрква, но Бабак врати веднаш за 26-25. Јагуриновски избори пенал, кој го погоди Кузмановски и немаше време за Чешка да прави камбек, па можеше да почне славјето во „Борис Трајковски“.
Најдобри стрелци во Македонија беа Кузмановски со девет и Талески со шест гола, додека Митревски собра 13 одбрани. Кај Чесите се истакнаа Пирох и Хрстка со по пет погодоци.
ПОВРЗАНИ ВЕСТИ
