Екипата на Вардар, која важи за еден од фаворитите за освојување на шампионската титула во Женската лига, денес немаше никакви проблеми против Астибо во Штип и прослави убедлива победа која беше изразена со резултат 38:25 во натпревар од 11. коло.
Избраничките на Драгана Ристова имаа фуриозен старт и уште во првите десет минути ги обезбедија новите бодови на свое конто. По водството од 7:3, ракометарките на Вардар со серија од 7:0 имаа плус 11 гола разлика, 14:3. Домаќинките одвреме – навреме постигнуваа погодок, но не можеа ништо повеќе да направат, а високиот пораз беше неизбежен откако гостинките на полувреме заминаа со предност од 17:8.
Со ист ритам се играше во второто полувреме. Вардарки едноставно доминираа на терен, а шанса да ги покажат своите квалитети имаа и ракометарките со помала минутажа од двете екипи. Гостинките на петнаесетина минути пред финишот имаа водство од 25:10. Последниот дел од натпреварот беше само формалност во која ракометарките на Вардар ни за момент не се опуштија и дополнително ја зголемија својата предност.
Одлична партија во вардаровиот дрес одигра Сара Миновска која постигна девет погодоци. Во поразената екипа листата на стрелци ја предводеше Марија Анчева со 12 погодоци.
ПОВРЗАНИ ВЕСТИ
