Ракометната федерација на Португалија донесе пакет мерки со кои ќе ги поддржи клубовите за полесно да ја надминат кризата предизвикана од коронавирусот.
Пакетот мерки содржи директна и индиректна помош за клубовите во износ од 600.000 евра. Изменетиот модел на натпреварување во најдобрите лиги во машка и женска конкуренција треба да овозможи помали трошоци за клубовите.
Новиот модел по кој ќе се играат првенствата во Португалија предвидува помал број на натпревари, а со тоа и намалување на трошоците за организација, патувања и судиите и официјалните лица. Освен тоа таксите за регистрација на нови играчи ќе бидат намалени. Поддршката е проширена на сите членови во клубовите вклучувајќи ги и техничките лица.
Главната цел на поддршката од федерацијата на Португалија на клубовите е опстојување на многубројните проекти, задржување на бројот на ракометарите, а исто така и промовирање на ракометот и враќање на нивото од пред пандемијата. Федерацијата како олеснителна околност на клубовите ќе ги избрише помалите парични казни на клубовите од сезоната 2019/20.
Според донесените мерки за поддршка на своите клубови, португалската федерација уште еднаш потврдува дека сериозно работи на развој на ракометот што во последниве години дава резултати. Потврда за тоа е успехот на репрезентацијата на Европското првенство кога го освои 6 место, а исто така најдобрите клубови од земјата имаат значајни успеси во европските купови.
ПОВРЗАНИ ВЕСТИ
