Во рамки на 7. коло од Лигата на шампиони за жени беа одиграни три натпревари во кои Битигхајм направи изненадување кај Ференцварош, додека очекувани победи забележаа Ростов на свој терен и ЧСМ Букурешт на гостувањето кај Крим.
Германките добро започнаа и најавија добар резултат, Ференцварош успеа да возврати, но тоа не траеше долго. Завршницата на првиот дел им припадна на гостинките кои заминаа на одмор со предност 11:14. Во вториот дел доминираше Битигхајм и стигна до голема и убедлива победа 35:24.
Ростов триумфираше на Есбјерг со 28:24 откако го скрши отпорот на противникот во вториот дел. По 30 минути игра беше 15:13 за домашниот тим, сепак Русинките не дозволија изненадување и стигнаа до планираниот триумф. Мангарова со седум гола го предводеше Ростов, додека Јакобсен за Есбјерг беше најефикасна со осум гола.
Крим не успеа да оствари нова победа и да направи изненадување против фаворитот ЧСМ Букурешт. Романките продолжувааат со добрите игри и забележаа победа во Словенија со 25:23, а на полувреме водеа со 12:11. Крим успеа да се врати од минус пет и дури да поведе, но немаше сили за конечен триумф.