Составот на Фуксе Берлин ја комплетираше двојката во финалето од Лигата на Европа откако во второто полуфинале ја совлада екипата на Рајн Некар со 35:32 и на тој начин се избори за дуел против Магдебург во мечот за трофејот.
Фуксе Берлин имаше повеќе од играта во поголемиот дел од средбата, а особено во првите 15 минути од средбата кога беше направена предност од дури осум гола. На средината од првото полувреме резултатот беше 12:4 во корист на „лисиците“ од Берлин.
Оваа предност беше доволна за контрола на играта, но и за мотив повеќе во составот на Рајн Некар. Имаше враќање во средбата откако тимот на Рајн Некар успеа да најде противигра. Во 24. минута резултатот беше 11:14 и тука веќе се гледаше дека ова ќе биде неизвесен дуел.
Почна да се игра брзо и ефикасно. Рајн Некар дојде и до два гола негатива, но тоа беше сè што можеше на овој дуел. Повеќе од овие два негатива не можеше, а на одмор тимот на Фуксе Берлин замина со 19:16.
Во продолжение тимот на Фуксе Берлин имаше контрола на резултатот. Постојано беше во водство и во ниту еден момент немаше проблеми за да дојде до позитивен резултат. Остана на предност од два до четири гола и имаше контрола на ова. До крајот на натпреварот беше одржана предност за конечни 35:32 и финале во кое утре ќе се соочат со Магдебург.
Милосављев заврши со десет интервенции, додека Паличка на голот на Рајн Некар заврши со 11 одбрани. Прв стрелец во победничкиот состав и на натпреварот беше Ласе Андерсон со 11 гола, додека Холм имаше шест. Во тимот на Рајн Некар, Толбринг имаше седум гола, а Нилсон шест.